QAZAQ GREEN. Ақорда Қазақстан президенті Қасым-Жомарт Тоқаевтың ресейлік «Известия» газетіне берген сұхбатын жариялады.

Қасым-Жомарт Тоқаев Қазақстан мен Ресей арасындағы бейбіт мақсатта қолданылатын атом саласындағы ықпалдастық – энергетикалық ынтымақтастығымыздың негізгі бағытының бірі екенін атап өтті. Сондай-ақ, президент еліміздегі атом энергетикасын дамыту әлеуеті туралы, атап айтқанда Қазақстандағы атом электр станциясы туралы айтты.

«Елімізде АЭС салуға қатысты түрлі пікір айтылып жүр. Бір жағынан, Қазақстанның атом энергетикасын дамыту әлеуеті мол. Еліміз табиғи уран өндіру көлемі жөнінен әлемде бірінші орын алады. Сондай-ақ ядролық отын компоненттерін өз елімізде өндіреміз және уранды изотопты байыту жөніндегі қызметтерге қол жеткізе аламыз. Үлбі металлургия зауытының базасында Қытайдың атом электр станциялары үшін дайын ядролық отын шығарылады.

Екінші жағынан, көптеген азаматтар мен сарапшылар атом станциясының қауіпсіздігіне күмән келтіреді. Семей ядролық сынақ полигонының ауыр қасіретін ескерсек, мұны түсінуге болады. Қазақстан аумағында АЭС салу мәселесінде Ресей тарапының жәрдем беру ұсынысын жоғары бағалаймыз. Әйтсе де АЭС құрылысы жөніндегі түпкілікті шешім референдум қорытындысы бойынша қабылданады», - деді Қазақстан президенті.

Қасым-Жомарт Тоқаев сайлауалды тұғырнамадан берген уәдесін еске салып өтті.

«Мен 2019 жылғы сайлауалды бағдарламамда аса маңызды стратегиялық проблемаларға қатысты шешім референдум арқылы қабылданады деп мәлімдеген едім», – деді ол.

Естеріңізге сала кетейік, Қазақстанның энергетика министрі Алмасадам Сәтқалиев бұған дейін Франция, Қытай, РФ және Кореядан қатысушылардың тізімі ресми түрде құрылғанын айтқан болатын. Осы тізімге қосымша Энергетика министрлігі американдық компаниялардың шағын модульдік реакторлар салу жөніндегі ұсыныстарын қарастыруда.

Бұл ретте министр мемлекет басшысының мәлімдемесіне сәйкес Қазақстанда атом станциясын салу жөнінде түпкілікті шешім қабылдау үшін жалпыұлттық референдум өткізілетінін атап өтті.