QAZAQ GREEN. 25 желтоқсанда Еуразиялық даму банкі (ЕАДБ) мен «Qazaq Green» ЖЭК қауымдастығы ынтымақтастық туралы меморандумға қол қойды. Оның мақсаты – сараптамалық-аналитикалық жұмысты ұйымдастыру, жобалар туралы ақпаратпен алмасу және өзара әрекеттестіктің басқа да бағыттарын дамыту.

Құжатқа ЕАДБ жоба блогының басшысы, аға басқарушы директор Азамат Түлеубай және Qazaq Green директорлар кеңесінің төрағасы Нұрлан Капенов қол қойды.

Қазақстан Республикасы Еуразия кеңістігінде жаңартылатын энергетика бойынша көшбасшылардың бірі болып табылады. Мемлекеттің әлеуметтік-экономикалық дамуының маңызды құрамдас бөлігі ретінде жаңартылатын энергия көздерін кеңейту ерекше орын алады: бүгінде ЖЭК станциялары елдегі электр энергиясының шамамен 6,5%-ын өндіреді.

«Жасыл энергетиканы қаржыландыру – банктің басым міндеттерінің бірі. ЕАДБ осындай жобаларға белсенді түрде инвестиция салуда. Қазіргі уақытта банк Қазақстанда 300 МВт-тан астам күн электр станцияларын және шамамен 250 МВт жел электр станцияларын салуға жобалық қаржыландыру ұсынды», – деп атап өтті Азамат Түлеубай.

ЕАДБ-тің 2022-2026 жылдарға арналған стратегиясы аясында Орталық Азияның су-энергетикалық кешені атты ірі инвестициялық мегажоба жүзеге асырылуда. Бұл жоба өңірдегі су-энергетикалық ынтымақтастықты кеңейтуге және қатысушы елдердің ұлттық әлеуметтік-экономикалық міндеттерін шешуге бағытталған. Қазақстан Республикасындағы «жасыл» интеграциялық жобаларды жүзеге асыру ЕАДБ қызметінің басым бағыттарының бірі болып табылады.

Qazaq Green қызметі Қазақстандағы ЖЭК саласын дамыту үшін қолайлы жағдай жасауға, «жасыл» экономика қағидаттарын ілгерілетуге және құқықтық реттеудің ашықтығын қамтамасыз етуге ықпал етеді. Қауымдастық «жасыл» энергетика саласының қатысушыларының мүддесін білдіреді және қорғайды. Сонымен қатар, ол инвесторларды, девелоперлерді, жабдық өндірушілерді, халықаралық қаржы институттарын және университеттерді біріктіреді.

«Еуразиялық даму банкі сияқты халықаралық қаржы институттарымен ынтымақтастық энергетика саласын декарбонизациялаудың табысты жүруіне маңызды фактор болып табылады. Қазіргі уақытта тек белгілі бір қаржы институттары ғана ЖЭК жобаларын қаржыландырады. Бұл жобалар, шын мәнінде, ұзақ мерзімді инфрақұрылымдық жобалар болып табылады. Сондықтан Qazaq Green мен ЕАДБ арасындағы меморандумға қол қою еліміздегі ЖЭК дамуына серпін береді», – деп атап өтті Нұрлан Капенов.

ЕАДБ мен Qazaq Green-ді БҰҰ-ның Тұрақты даму мақсаттарын жүзеге асыру және Қазақстан Республикасының көміртекті бейтараптыққа қол жеткізуге деген ұмтылысы біріктіреді. Меморандумға қол қою ЕАДБ мен Qazaq Green арасындағы ынтымақтастықты дамытудың маңызды қадамы болып табылады. Бұл құжат жаңартылатын энергия көздерінің елдің энергетикалық теңгеріміндегі үлесін арттыруға және Еуразия кеңістігінде таза энергия саудасын ынталандыруға ықпал етеді.

Еуразиялық даму банкі (ЕАДБ) – еуразиялық кеңістікте инвестициялық қызмет жүргізетін көпжақты даму банкі. 18 жылдан астам уақыт бойы ЕАДБ қатысушы елдердің экономикалық байланыстарын нығайтуға және жан-жақты дамуына ықпал етіп келеді. ЕАДБ-ның жарғылық капиталы 7 миллиард АҚШ долларын құрайды. ЕАДБ портфелінің негізгі бөлігін көлік инфрақұрылымы, цифрлық жүйелер, жасыл энергетика, ауыл шаруашылығы, өнеркәсіп және машина жасау, сондай-ақ су-энергетикалық кешен саласындағы интеграциялық әсері бар жобалар құрайды. Банк өзінің қызметінде БҰҰ-ның Тұрақты даму мақсаттары мен ESG қағидаттарын басшылыққа алады.

«Qazaq Green» жаңартылатын энергия көздері қауымдастығы Қазақстандағы ЖЭК секторын дамытуға қолдау көрсету мақсатында жұмыс істейтін қоғамдық салалық бірлестік болып табылады. Ол инвесторларды, девелоперлерді, жабдық өндірушілерді, сондай-ақ халықаралық қаржы институттарын, зерттеу және жобалау институттарын біріктіреді.

Qazaq Green-нің маңызды міндеттерінің қатарында заң шығару процесіне қатысу және ЖЭК бизнес-қоғамдастығының мүддесін түрлі деңгейлерде ұсыну бар. Қауымдастық салалық Qazaq Green журналын шығарады және Qazaq Green Fest жаңартылатын энергия көздері бойынша халықаралық фестивалін ұйымдастырады. Қазіргі уақытта Qazaq Green Қазақстанда мемлекеттік органдар мен бизнес-қоғамдастық үшін ЖЭК дамыту бойынша негізгі сараптамалық орталықтардың бірі болып табылады.