QAZAQ GREEN.  Түркістан облысында қуаты 1000 МВт-қа дейін жететін бу-газ электр станциясының құрылысы қарқынды жүріп жатыр. Бұл жоба Мемлекет басшысы белгілеген «Дамыған аймақтар – қуатты экономика» қағидатын іске асыру аясында жүзеге асуда. Станцияның іске қосылуы Түркістан облысындағы электр энергиясының тапшылығын жоюға мүмкіндік береді, деп хабарлады Түркістан облысы әкімінің баспасөз қызметі.

Электр станциясы Сайрам ауданының Қарамұрт ауылында салынып жатыр. Жобаны «Самұрық-Қазына» қорының еншілес ұйымы – «БГҚ Түркістан» ЖШС жүзеге асыруда. Құрылыс жұмыстары оңтүстіккореялық Doosan Enerbility және қазақстандық Bazis Construction компанияларының консорциумы тарапынан жүргізілуде. Станция іске қосылғаннан кейін ол екі миллионнан астам тұрғынды электр қуатымен қамтамасыз етеді.

Жалпы құны 800 миллиард теңгені құрайтын бұл жоба толық қуатына шыққанда 926,5 МВт электр энергиясын өндіретін болады. Негізгі техникалық жабдықтарды жеткізушілер арасында Siemens Energy (Германия) газ турбиналарын, Doosan Skoda Power (Чехия) бу турбиналарын ұсынады. Сондай-ақ қазандық құрылғылары Италиядан әкелінсе, қуат арттыру трансформаторларын қазақстандық Asia Trafo компаниясы жеткізеді. Құрылысы заманауи технологиялар негізінде жүргізіліп жатқан кешенге 60 гектар жер бөлінген.

Қазіргі уақытта құрылыс жұмыстарына 11 компаниядан 2500-ге жуық адам тартылған, олардың басым бөлігі – Төлеби және Сайрам аудандарының тұрғындары. Станция толық іске қосылғаннан кейін 300-400 адам тұрақты жұмысқа орналасады деп күтілуде.

Станцияны газбен қамтамасыз ету үшін магистральды газ құбыры тартылуда. Газ жүйелері жүргізілетін аймақтарда жер телімдерін сатып алу жұмыстары жүргізіліп, құрылыс-монтаждау қарқыны артып келеді.

Жобаның жүзеге асырылуы өңір экономикасына оң әсер етіп, жаңа жұмыс орындарын ашуға және Түркістан облысының өндірістік әлеуетін арттыруға ықпал етеді. Сонымен қатар, осы аймақта индустриалды парк құру жоспарлануда.