QAZAQ GREEN.  Сколтех ғалымдары ММУ, МФТИ және басқа да ғылыми ұйымдардан әріптестерімен бірге диатомды қабықтардың құрылымын зерттеп,олардың жоғары технологиялық құрылғыларда – күн панельдерінен жасанды фотосинтез жүйелеріне дейін қолдануға болатын бірегей оптикалық қасиеттерге ие екенін анықтады, деп хабарлайды институт сайты.

Нәтижелер Ресей ғылыми қорының қолдауымен Optica журналында жарияланды.

Зерттеу нысаны Coscinodiscus Oculus-iridis түрі болды – симметриялы саңылаулармен тесілген қатты кремний сауыты бар бір жасушалы балдырлар. Ғалымдар бұл құрылымда Тальбот әсері байқалатынын анықтады: жарықтың тұрақты тесіктер торындағы дифракциясы есебінен жарық сауыттың ішінде нақты нүктелерге шоғырланады.  Бұл балдырларға фотосинтез үшін күн энергиясын тиімдірек алуға көмектеседі деп болжануда.

«Диатомдардың сауыттары тек қорғаныс емес, олар жарықпен белсенді өзара әрекеттеседі. Біз балдырлар жарықтың фокусын хлоропластарға бағыттай отырып, оны жасуша ішінде оңтайлы тарату үшін пайдаланады деп болжаймыз», – деп атап өтті Сколтех Инженерлік физика орталығының доценті Сергей Дьяков, зерттеудің бірінші авторы.

Келесі кезеңде команда теориялық болжамды әсерді растау үшін масштабталған жасанды сауытпен тәжірибе жасауды жоспарлап отыр.

Сколтех Фотоника орталығының аға ғылыми қызметкері Юлияна Цветиновичтің айтуынша, жаңалық әлеуеті орасан. «Біз табиғаттың оптикалық құрылымдарды қалай ұйымдастыратынын көбірек түсінеміз. Бұл білім жаңа сенсорларға, өзін-өзі реттейтін жарыққа сезімтал жабындарға, күн батареяларына және тіпті, күн энергиясын химиялық отынға айналдыратын жүйелерге негіз бола алады», – дейді Юлияна Цветинович.

Жоба жетекшісі профессор Дмитрий Горин атап өткендей: «Диатомдар – табиғаттың нағыз жауһары. Біз жарық пен материяның өзара әрекеттесуінің жаңа қағидалары туралы олардың бізге қаншалықты көп нәрсе айта алатынын енді ғана түсіне бастадық».

Зерттеуге сонымен қатар Жүйелік жобалау орталығының, Фотоника орталығының, Сколтех Инженерлік физика орталығының, ММУ, МФТИ, РҒА Карадаг биостанциясының және РҒА Сібір бөлімінің Лимнологиялық институтының ғалымдары қатысты.