QAZAQ GREEN.  Оңтүстік Орал мемлекеттік университетінің (Ресей) зерттеушілері тазарту және тұзсыздандыру кезінде суды жылыту үшін күн батареяларының артық жылуын пайдалану технологиясын ойлап тапты. Жоба аясында ғалымдар фотоэлектрлік панельдің оқшауланған артқы бетінің температурасын есептеу үшін әлемдегі алғашқы бағдарламаны құрды және күн модулі негізінде жұмыс істейтін құрылғыны патенттеді, деп хабарлайды университет сайты. 

Әзірлеме Ресей ғылыми қорының гранттық қолдауымен жүзеге асырылды. Жаңа қондырғыда фотоэлектрлік панель электр энергиясының көзі ғана емес, сонымен қатар суды жылыту жүйесінің элементі ретінде де қызмет етеді. Әдетте, күн панельдері шығаратын жанама жылу атмосфераға таралады. Ғалымдар оны практикалық қажеттіліктер үшін кәдеге жаратуды ұсынды.

Панельдің артқы жағында жыту тасығышпен иректүтік орналасқан, онда су қызады. Дистилляциялық қондырғының жұмысы үшін шамамен 30 °C температура жеткілікті. Бұл параметрді бақылау панельдің оқшауланған бетінің температурасын есептейтін арнайы жасалған компьютерлік бағдарламаның көмегімен қамтамасыз етіледі.

Бағдарлама Python тілінде жазылған және арнайы техникалық білімсіз пайдалануға арналған. Барлық қажетті параметрлер мен өлшенген деректер жүйеге біріктірілген, есептеулер автоматты түрде орындалады және су температурасының мәндері нақты уақыт режимінде экранға шығарылады.

Әзірлеушілердің айтуынша, технологияның бірегейлігі бұрын мұндай инженерлік шешімдерде қолданылмаған жылуды пайдалану болып табылады. Берілген жүйедегі фотоэлектрлік панель бір уақытта электр генераторы мен су жылытқышының функцияларын орындайды.

Әзірлеме химиялық су тазарту кәсіпорындарында, сондай-ақ жаңартылатын және гибридті энергия көздерін пайдаланатын энергетикалық объектілерде сұранысқа ие болуы мүмкін. Технология күн панельдерінің тиімділігін арттыруға, судың температурасын дәл бақылауға және өндірістік қажеттіліктер үшін қыздырылған салқындатқышты пайдалануға мүмкіндік береді.