QAZAQ GREEN. Израильдің Энергетика министрлігі энергияны сақтау жөніндегі жаңа ұлттық зерттеу институтын құру үшін Бар-Илан Университеті мен Израиль технологиялық институтын таңдады, деп хабарлайды The Jerusalem Post Израильдің Энергетика министрлігіне сілтеме жасап.

Бұл жаңа институтты Энергетика министрлігінің бас ғалымы доктор Гидеон Фридман жетекшілік ететін бірлескен басқару комитеті басқарады. Сонымен қатар, жаңа институтты Бар-Илан Университетінің Энергетика және орнықты даму орталығының ғылыми директоры, профессор Дорон Аурбах және Технион энергетикалық бағдарламасының (GTEP) директоры, профессор Йоэд Цур басқарады.

Энергияны сақтау жөніндегі жаңа зерттеу институтының бюджеті бес жылға шамамен 130 миллион шекельді ($37 млн) құрайды, оның 100 миллион шекелі ($28.4 млн) Энергетика министрлігінен, ал қалған 30 миллион шекелі ($8.52 млн) Бар-Илан мен Технионнан келіп түседі.

Институттың мақсаты - Израильдің энергетика секторын ұлттық стратегиялық энергетикалық міндеттерді шешу бойынша жұмыс істеуге итермелеу, сондай-ақ осы салада болашақ сарапшыларды дайындау және өнеркәсіптік секторға академиялық орталарда сарапшылар жасаған жаңа инновациялық технологияларды ұсыну.

Атап айтқанда, институт Израильдің мақсатына - 2050 жылға қарай парниктік газдар шығарындыларының нөлдік деңгейіне қол жеткізуге ықпалын тигізеді – бұл мақсат жалғасып жатқан климаттық дағдарыс аясында қойылған болатын. Ол үшін күн және жел турбиналары сияқты жаңартылатын энергия көздеріне толық көшу талап етіледі.

Күн энергиясында да, жел турбиналарында да тұрақты энергия шығымы болмағандықтан, энергияны көп мөлшерде сақтаудың жаңа тәсілдерін жасау қажет.

Институт зерттейтін кейбір салаларға мыналар жатады:

- Отын элементтерінің жұмысын жақсарту

- Экологиялық таза сутекті тиімді өндіру және оны қауіпсіз және ыңғайлы сақтау жолын табу

- Аса қауіпсіз және құрамында сұйықтығы болмайтын қатты күйдегі батареялар

- Сыйымдылығы көлемді ағынды батареялар

- Электр энергиясын жақсырақ жеткізе алатын және қуаттың өте жоғары тығыздығына ие жаңа кабельдер

- Энергия тығыздығы жоғары темір және мырыш негізіндегі металл-ауалы батареялар

- Литий-ионды батареяларға қарағанда, арзан әрі кеңінен таралған натрий-ионды батареялар.

«Ауқымды энергияны сақтау саласы жаңартылатын энергия көздерін қуатты интеграциялау үшін маңызды міндеттердің бірі болып табылады. Жаңа энергетикалық институт министрліктің энергияны сақтау саласындағы қосымша күш-жігерін жалғастыра отырып, Израильге осы салада көшбасшы болуға мүмкіндік береді. Академиялық ортаның, өнеркәсіп пен үкіметтің өкілдерінен тұратын басқару комитеті басқаратын институт алғаш рет құрылуда», – деп Фридманның мәлімдемесін келтіреді басылым.