QAZAQ GREEN.  Халықаралық және қазақстандық қаржы институттары Қазақстанда жаңартылатын энергия көздері секторының дамуына үлкен үлес қосты, олардың ұзақ мерзімді қаржыландыруының арқасында ол соңғы онжылдықта қарқынды өсті. Алайда, одан әрі даму үшін қолдау тәсілдеріне өзгерістер қажет және қаржы институттары осы нарық ойыншыларынан кері байланысқа дайын. Дәл осы мәселелер 14 наурызда Астанада өткен «Қазақстан Республикасында жаңартылатын энергия көздерінің жобаларын қаржыландыру» атты дөңгелек үстелде талқыланды.

«Qazaq Green» ЖЭК қауымдастығының Директорлар кеңесінің төрағасы Нұрлан Қапенов іс-шараға қатысушыларға Қазақстанда ғана емес, жаһандық деңгейде де экономикалық реформаларды қолдаудағы халықаралық қаржы институттарының маңызды рөлі туралы еске салды. Оның айтуынша, мұндай ұйымдар ұзақ мерзімді перспективада экономиканың тұрақты дамуын қамтамасыз ететін кредиттер мен қаржылық емес көмек көрсетеді. Бұл рөл Қазақстандағы ЖЭК секторы үшін де маңызды.

«Біз Еуропалық қайта құру және даму банкі, Азия даму банкі, Қазақстанның Даму Банкі, Еуразиялық даму банкі сияқты қаржы институттарының арқасында соңғы 10 жылда ЖЭК секторының дамуындағы серпінге куә болдық. Бұл жерде ұзақ мерзімді инфрақұрылымдық жобаларға қолайлы қаржыландыруды ұсыну ғана емес, сонымен қатар заңнамада біртұтас саясат құру да маңызды. Бұған қаржы институттары көмектесті», – деді Нұрлан Қапенов.

Қазіргі уақытта елде ЖЭК барлық өндіруші қуаттан шамамен 6% құрайды. 140-тан астам электр станциялары жұмыс істейді, оның ішінде 1,5 гигаватты жел станциялары, 1,2 гигаватты – күн, 0,25 гигаватты – шағын гидроэлектр станциялар және 20 мегаватты – газ станциялары құрайды. Қазақстанда жаңа ЖЭК қуаттарына жыл сайынғы аукциондарды қамтитын реттеушілік база қалыптасып үлгерді, сондай-ақ Үкімет тікелей келіскен шетелдік инвесторлармен бірнеше үлкен жобалар бар. Сектордың одан әрі өсуі үшін нарықтың барлық ойыншылары арасында тұрақты диалог қажет, деп атап өтті дөңгелек үстелге қатысушылар.

«Біз үшін біртұтас қоғамдастық болып алға жылжу, нарықты дамыту және 2060 жылға қарай көміртегі бейтараптығына жету жөніндегі негізгі мақсатқа қол жеткізу үшін қандай өзгерістер мен реформалар қажет екенін есту маңызды», – деді Қазақстандағы ЕҚДБ директорының орынбасары Ерлан Рамазанов.

Сондай-ақ, іс-шарада Азия инфрақұрылымдық инвестициялар банкінің қызметкері Игорь Попков, DEG неміс қаржы даму институтының аға инвестициялық менеджері Эдуард Рель және Қазақстан Даму Банкінің басқарушы директоры Әсем Шакенова жеке баяндама жасады.

Дөңгелек үстелді «Qazaq Green» ЖЭК қауымдастығы «Оңтүстік-Шығыс және Шығыс Еуропа, Оңтүстік Кавказ және Орталық Азия елдерінде климаттық саясат саласындағы әлеуетті дамыту» GIZ жаһандық жобасының (CDCP) және Еуропалық қайта құру және даму банкінің қолдауымен ұйымдастырды.