QAZAQ GREEN. Алматыда су және жер ресурстарын тұрақты басқарудың, энергетиканың, азық-түлік қауіпсіздігінің және өңірдегі климаттың өзгеруі мәнмәтінінде экологиялық тұрақтылықтың өзекті мәселелерін талқылау үшін Орталық Азия елдері делегацияларының және халықаралық сарапшылардың қатысуымен Климаттың өзгеруі мәселелері жөніндегі Орталық Азия конференциясы (CACCC-2024) өтуде.

Сейсенбіде Trend Дүниежүзілік банкке сілтеме жасай отырып хабарлағандай, конференция сонымен қатар 2024 жылғы 11-22 қарашаға Бакуде жоспарланған БҰҰ Климаттың өзгеруі туралы негіздемелік конвенциясы (COP29) тараптарының алдағы 29-шы конференциясына Орталық Азия мемлекеттері үкіметтерінің қатысуын талқылау үшін дайындық кезеңі ретінде болады.

Конференция барысында қатысушылар Орталық Азия елдерінің климаттық міндеттемелерін орындаудағы прогресті, проблемалар мен олқылықтарды, көміртегі бейтараптығы, «жасыл» ауысу және қауіпсіздік мәселелерін қарастырады, сондай-ақ климатқа байланысты табиғи апаттар қаупін азайту жөніндегі ұжымдық іс-қимылдарды зерттейді. Сондай-ақ климаттың өзгеруіне бейімделу саласындағы өңірлік ынтымақтастықты нығайту әлеуеті талқылануда.

Мысалы, Орталық Азия өңірлік экологиялық орталығының атқарушы директоры Зафар Махмудов конференцияда сөйлеген сөзінде өңірдің ауыл шаруашылығы экономикасын, тозған инфрақұрылымын және халықтың қарқынды өсуін ескере отырып, тез өзгеретін климаттың қолайсыз салдарына осал екенін атап өтті.

«Бұл жағдайда климаттың өзгеруіне бейімделу тәсілдерімен қатар энергетика және су ресурстарын басқару саласындағы өңірлік ынтымақтастықты жақсарту қажеттілігі айқын. Конференция өңірдің тұрақтылығын арттыру үшін осы ынтымақтастықты нығайтуға бағытталған», – деді ол.

Өз кезегінде Дүниежүзілік банктің Орталық Азия бойынша өңірлік директоры Татьяна Проскурякова климаттың өзгеруі өзекті мәселе болып табылатынын және Орталық Азия елдері оны бірге жұмыс істеген жағдайда ғана шеше алатынын атап өтті.

«Бұл жасыл саясатты қабылдау мен жүзеге асырудан бастап жасыл қаржыландыруды және жаңартылатын энергия көздеріне, тұрақты ауыл шаруашылығына және отандық ресурстарды басқаруға инвестицияларды орналастыруға дейінгі көптеген мәселелерді бір уақытта шешуді білдіреді», – деді ол.

Естеріңізге сала кетейік, осы жылдың қараша айында Әзірбайжанда БҰҰ-ның Климаттың өзгеруі туралы негіздемелік конвенциясы (COP29) тараптары конференциясының 29-шы сессиясы өтеді. Бұл туралы шешім өткен жылдың 11 желтоқсанында Дубайда өткен COP28 пленарлық отырысында қабылданды. Екі апта ішінде Баку әлемнің орталығына айналып, 70-80 мыңға жуық шетелдік қонақтарды қабылдайды.

БҰҰ-ның Климаттың өзгеруі туралы негіздемелік конвенциясы – бұл 1992 жылы маусымда Рио-де-Жанейрода өткен Жер саммитінде адамның климаттық жүйеге қауіпті араласуын болдырмау мақсатында жасалған келісім. COP (Conference of Parties) аббревиатурасы «Тараптар конференциясы» дегенді білдіреді, ол Климаттың өзгеруі туралы негіздемелік конвенцияның іске асырылуын бақылайтын жоғары заң шығарушы орган болып табылады.

Конвенцияның тараптары 198 ел болып табылады. Егер тараптардың басқа шешімі болмаса, COP жыл сайын өткізіледі. COP алғашқы іс-шарасы 1995 жылы наурызда Берлинде өтті, ал оның хатшылығы Бонн қаласында орналасқан.