QAZAQ GREEN. Қазақстанда елдің энергия теңгеріміндегі жаңартылатын энергия көздерінің үлесін 2035 жылға қарай 24,4%-ға дейін жеткізу жоспарлануда. Қазір оның үлесі 6,5% құрайды. Атап айтқанда, мәлімделген көрсеткішке қол жеткізу үшін ЖЭК орнататын және пайдаланатын кәсіпкерлерге жеңілдікті кредиттер беріледі, деп хабарлайды 24.kz.

Осылайша, БҰҰДБ-ның жасыл технологиялар саласындағы шағын және орта бизнесті қолдау жөніндегі мемлекетпен бірлескен бағдарламасы аясында жалпы сомасы бір жарым миллион АҚШ долларынан асатын 60-тан астам жоба қаржыландырылды. Ал осы жобаларды іске асыру есебінен 5 миллион АҚШ доллары көлемінде инвестиция тартылды.

Сарапшылардың пікірінше, енді екі ай бұрын енгізілген «Жаңартылатын энергия көздерін пайдалануды қолдау туралы» Заңға түзетулер енгізіледі.

«Негізгі түзетулер желіге қосылу процестерін төрешілдіктен арылтуға қатысты болды, сондай-ақ мұндай жобалардың қуаты жүз киловаттан екі жүзге дейін ұлғайтылды. Қазір бизнес өз төбесінде қуаты 200 киловатт күн станциясын орнатып, өз қажеттіліктері үшін электр энергиясын тұтынып, артығын белгіленген тариф бойынша желіге сата алады», – деді ЖЭК-ке инвестициялау тәуекелдерін төмендету жөніндегі жобаның үйлестірушісі Адамбек Нұржан.

Естеріңізге сала кетейік, Қазақстанда БҰҰ Даму Бағдарламасы (БҰҰДБ) жаңартылатын энергия көздері (ЖЭК) технологияларына инвестициялау тәуекелдерін төмендету жөніндегі жобаның нәтижелерін ұсынды. БҰҰДБ Жаһандық экологиялық қордың (ЖЭҚ) қаржылық қолдауымен Қазақстан Республикасының Энергетика министрлігімен серіктестікте іске асыратын жобаның жабылуына байланысты іс-шарада сарапшылар ЖЭК саласын дамыту перспективаларын талқылады, қолдаудың қаржылық және қаржылық емес тетіктерін одан әрі енгізу бойынша ұсынымдар, сондай-ақ болашақта іске асырылуы тиіс жаңа тәсілдерді ұсынды.

«Министрлік еліміздің энергия теңгерімінде жаңартылатын энергия көздерінің үлесін ұлғайту бойынша белсенді жұмыс істеуде, бұл Қазақстанға парниктік газдар шығарындыларын азайтып қана қоймай, энергетикалық қауіпсіздікті нығайтуға мүмкіндік береді. Электр энергетикасы саласын дамыту жөніндегі іс-шаралар жоспарын табысты іске асыру кезінде 2035 жылға қарай отын түрлері бойынша белгіленген қуаттың құрылымы мынадай түрде қалыптасады: ЖЭК – 24,4 пайыз; ГЭС – 10,8 пайыз; газ – 25,8 пайыз; көмір – 34,3 пайыз», – деп атап өтті Қазақстан Республикасының энергетика вице-министрі Сұңғат Есімханов.