QAZAQ GREEN. Қазақстан мен Финляндия энергетика саласындағы стратегиялық әріптестікті жаңа деңгейге көтерді. Финляндия Президенті Александр Стуббтың Астанаға ресми сапары аясында ҚР Энергетика министрлігі мен Финляндияның Экономика және еңбек министрлігі арасында энергетика саласындағы стратегиялық ынтымақтастық туралы өзара түсіністік туралы Меморандумға қол қойылды.

Құжатқа ҚР Энергетика министрі Ерлан Ақкенженов пен Финляндияның Экономика және еңбек министрлігінің тұрақты хатшысы Тимо Яаатинен қол қойды. Меморандум энергетика және жасыл экономика бағыттарындағы екіжақты ынтымақтастықты кеңейтуге, сондай-ақ таза және энергия үнемдейтін технологияларды дамытуға, энергетикалық қауіпсіздікті қамтамасыз етуге және өндірісті декарбондауға бағытталған.

Ынтымақтастық шеңберінде тараптар сарапшылармен және озық тәжірибемен алмасу, сондай-ақ университеттер мен ғылыми орталықтар арасында бірлескен зерттеу және инновациялық жобаларды іске асыру мәселелерін қарастырды.

Осы келісімдерді іске асыру мақсатында ҚР Энергетика министрлігінде вице-министр Санжар Жаркешовтің және Тимо Яаатинен бастаған фин делегациясының қатысуымен кездесу өтті. Келіссөзге EastCham Finland, Wärtsilä, Finnvera және Nurminen Logistics сияқты фин компанияларының өкілдері қатысты.

Кездесу барысында тараптар энергетикалық инфрақұрылымды жаңғырту, жаңартылатын энергия көздерін дамыту, энергия тиімділігін арттыру және инвестициялық жобаларды іске асыру перспективаларын талқылады.

Санжар Жаркешов атап өткендей, Қазақстан Финляндиямен энергетика саласындағы серіктестікті тереңдетуге, тәжірибе алмасуға және тұрақты энергетикалық жобаларға инвестиция тартуға мүдделі. «Wärtsilä» компаниясымен бірлескен жұмыс тәжірибесі екі ел арасындағы ынтымақтастықтың нәтижелі екенін көрсетті.

Тараптар сондай-ақ «жасыл» трансформация және декарбонизация бойынша бастамаларды қолдауға ниетті екендерін білдірді. Бұл бағыттар Қазақстанның 2060 жылға қарай көміртегі бейтараптығына қол жеткізу жөніндегі стратегиялық мақсаттарымен үндеседі.

Қойылған міндеттерді іске асыру үшін екіжақты жұмыс тобы құрылды. Оның алғашқы отырысы өткен жылы өтті, ал биыл нақты жобалар мен өзара іс-қимыл тетіктерін талқылау жоспарланып отыр.

Келіссөз қорытындысы бойынша тараптар энергетика саласындағы серіктестікті одан әрі кеңейту және жаңартылатын энергия көздерін дамыту бағытындағы бірлескен жобаларды жандандыру туралы ортақ пікірге келді.