QAZAQ GREEN. Әзірбайжан 2030 жылға қарай жаңартылатын энергия көздерінің (ЖЭК) үлесін 35,5 пайызға дейін арттыруды мақсат етіп қойды.

BMG мәліметінше, бұл туралы Әзірбайжанның энергетика министрі Парвиз Шахбазов «Жаңартылатын энергия көздерінің көлемін үш есе арттыру және энергия тиімділігін екі есе ұлғайту үшін инвестицияларды кеңейту» тақырыбындағы министрлік диалогында мәлімдеді.

«Шығыс Зангезурдағы «жасыл» энергетика аймағында қуаты 200 мегаватт болатын күн электр станциясы Әзірбайжандағы мұнай-газ секторын декарбонизациялауға елеулі үлес қосады. Жалпы алғанда, 2030 жылға қарай іске қосылатын қуаты 2 250 мегаватт күн және жел электр станциялары белгіленген қуаттылықтағы жаңартылатын энергияның үлесін 35,5 пайызға жеткізеді. Бұл біздің бұрынғы 30 пайыздық мақсатымызды жаңартып қана қоймай, сонымен қатар энергия жүйеміздегі күн және жел энергиясының үлесін жеті еседен астам арттыратынын білдіреді», – деді Шахбазов.

Министрдің айтуынша, бұл күн электр станциясы әлемдегі ең ірі мұнай-газ терминалдарының бірі – Сангачал терминалын энергиямен қамтамасыз етеді.