QAZAQ GREEN. Mercedes-Benz компаниясы автомобильдерге арналған, күн сәулесінен электр энергиясын өндіретін инновациялық жабын әзірлеуде. Жаңа фотогальваникалық бояу электромобильдерге жылына 12 мың километрге дейінгі қашықтықты зарядсыз жүріп өтуге мүмкіндік береді. Бұл технология тек 5 микрометрлік ультражұқа қабатты бояуды қолдануды қарастырады – бұл адамның шашынан да жұқа, деп хабарлайды Хайтек+ Interesting Engineering сайтына сілтеме жасап.

Бұл бояу автомобильдің 11 м² бетіне дейін жаба алады. Mercedes-Benz күн модульдерінің тиімділігі 20% болатын бұл жабынның жетек жүйесін тікелей қуаттандыратынын немесе жоғары вольтты батареяны зарядтай алатынын мәлімдейді.

Жабын кез келген бетке сәйкес келеді және күн энергиясының 94%-ын өткізетін нанобөлшектерді қолдану арқылы жасалған. Материалдың салмағы бар болғаны 50 грамм/м² құрайды, бұл оны автомобильдің кез келген бетіне және бұрыштарына жағуға жеңіл әрі әмбебап етеді. Сонымен қатар, бұл жабын экологиялық таза: ол уытты материалдар, сирек кездесетін элементтер және кремнийден тұрмайды, оңай қайта өңделеді және дәстүрлі күн модульдерінен арзанырақ.

Жүйенің тиімділігі жарықтандыру деңгейіне, күн сәулесінің қарқындылығына және географиялық орналасуға байланысты. Мысалы, Штутгартта, мұнда жүргізушілер күнделікті орта есеппен 32 километр жүреді, күн энергиясы арқылы маршруттың шамамен 62%-ы қамтылады. Ал Лос-Анджелестің шуақты ауа райында жабын күнделікті толық қашықтықты қамтамасыз етеді, ал артық энергияны үй желісіне беру үшін қос бағытты зарядтауды пайдалануға болады.

Бұл жүйе көлік өшірулі болса да жұмыс істеп, кез келген уақытта энергия өндіреді. Mercedes-Benz бұл технология электромобильдердің жүріс қашықтығын айтарлықтай арттырып, зарядтау қажеттілігін азайтады және оларды үйлердің энергожүйелерімен біріктіруге мүмкіндік береді деп үміттенеді.

«Инновациялар біздің компаниямыздың дамуындағы негізгі қозғаушы күш болды. Біз 140 жылға жуық уақыт бойы автомобиль жасаудағы бағытты айқындайтын технологияларды жасап келеміз», – деп Mercedes-Benz Group AG басқарма мүшесі Маркус Шефер мәлімдеді.

Зерттеулер жалғасуда, бірақ болашақта Mercedes-Benz бұл күн сәулесін жинайтын бояуды өз көліктерінің барлық сыртқы беттеріне қолдануды жоспарлап отыр.