QAZAQ GREEN. Қырғыз Республикасының энергетика министрі Таалайбек Ибраев Германия Федеративтік Республикасына жұмыс сапарымен барды, деп хабарлайды «Вечерний Бишкек».

Сапар аясында Қырғыз Республикасының Үкіметі мен «Sonnenenergie, a.s.», «AB Progressio GmbH», «LTI ReEnergy CleanTech Project Development UG», «СЭС Токтогул» ААҚ, «СЭС Токтогул КГ» ААҚ компаниялары арасында екі қалқымалы күн электр станциясын салу және пайдалану жобасын іске асыру жөнінде Инвестициялық келісім-шартқа қол қойылды.

Қол қойылған құжаттың негізгі мақсаты – Қырғыз Республикасының жасыл энергетика жобаларына инвестиция тарту, электр энергиясын импортқа тәуелділікті азайту, энергетикалық қауіпсіздік пен тәуелсіздікті нығайту.

Құжатқа Қырғыз Республикасының энергетика министрі Таалайбек Ибраев, «Sonnenenergie, a.s.» компаниясының директорлар кеңесінің төрағасы Ян Зоненшайн, AB Progressio GmbH инвесторы, басқарушы серіктес Арнольд Беренс, LTI ReEnergy CleanTech Projekt Development UG басқарушы серіктесі Михаэль Белльмер, «СЭС Токтогул» және «СЭС Токтогул КГ» компанияларының бас директоры Ануар Топеев қол қойды.

Жоба аясында қуаты 612 МВт болатын қалқымалы күн электр станциясы салынады, ол екі кезеңнен тұрады. Құрылыс жұмыстары төрт жылға дейін созылады.

Сондай-ақ, Қырғыз Республикасының энергетика министрлігі мен «Siemens Energy Global GmbH & Co. KG» арасында энергетика саласындағы жобаларды зерттеу және іске асыру мақсатында өзара түсіністік туралы Меморандумға қол қойылды.

Құжатқа Қырғыз Республикасының энергетика министрі Т. Ибраев пен «Siemens Energy Global GmbH & Co. KG» компаниясының Түркия және Орталық Азия аймақтарындағы вице-президенті Максим Зубов қол қойды.