QAZAQ GREEN. Рудныйдың аумағында жаңартылатын энергия көзі пайда болады. Бұл туралы Қостанай облысының әкімі Кумар Аксакалов Орталық коммуникациялар қызметіндегі брифингте мәлімдеді, деп хабарлайды Kazinform.

Облыс басшысы соңғы жылдары Қостанай өңірінде баламалы энергия көздерін дамытуда айтарлықтай қадам жасалғанын атап өтті. Қолданысқа енгізілген жаңартылатын энергия көздерінің қуаты 2022 жылы 50 МВт-тан 2024 жылы 98 МВт-қа дейін екі есеге жуық өскен. Бұл жаңа жел электр станцияларының құрылысымен жүзеге асырылуда.

«Бүгінде облыста электр энергиясын тұтыну (0,45 ГВт) өндіруден (0,12 ГВт) 4 есе көп. Өңір жасыл энергияны белсенді дамытып жатыр: алдағы жылдары жаңа жел станцияларын, сондай-ақ күн және газ-поршенді электр станцияларын салу жоспарлануда. Алайда нағыз серпіліс Рудный қаласында ірі жобаның іске асырылуы болмақ. Мұнда 1 ГВт қуаттылықтағы жел электр станциясы салынады», – деді әкім.

Станция 165 жел турбинасымен жабдықталады. Бұл құрылым өңірдегі электр энергиясын өндіру көлемін 9 есе арттыруға мүмкіндік береді.

Жалпы, «жасыл» жобаларды жүзеге асыру арқылы аймақтағы электр энергиясын өндіру 9 есе өседі (0,12 ГВт-тан 1,12 ГВт-қа дейін) және облыстың электр қажеттілігін толық қамтамасыз етеді.