QAZAQ GREEN. 27 желтоқсанда Қазақстан Республикасынан «KEGOC» АҚ, Әзербайжан Республикасынан «Азерэнержи» ААҚ және Өзбекстан Республикасынан «Өзбекстанның ұлттық электр желілері» АҚ жүйелік операторлары құрылтай келісіміне қол қойды, деп хабарлайды ҚР Энергетика министрлігінің баспасөз қызметі.

Бұл құжат Қазақстан, Әзербайжан және Өзбекстан Республикалары арасында жасыл энергия өндіру және беру жобасы бойынша келісімді жүзеге асырудағы маңызды қадам болып табылады. Аталған келісімге 2024 жылғы 13 қарашада осы мемлекеттердің басшылары қол қойған болатын.

«Жасыл дәліз» деп те аталатын бұл жобаны іске асыру Еуропалық Одақтың «Жасыл мәмілесі» сияқты жаңа бастамаларды ескере отырып, сауда мүмкіндіктерін арттырады.

Энергетика министрі А. Сәтқалиевтің айтуынша, бұл жоба өңірдің ЖЭК даму әлеуетін іске асыру, халықаралық энергия ресурстарын жеткізу сенімділігін арттыру үшін бірегей мүмкіндіктер жасайды.