QAZAQ GREEN.  Қостанайда ҚР Энергетика вице-министрі Құдайберген Арымбектің Қостанай облысы тұрғындарымен кездесуі өтті. Ашық диалог барысында ол энергетика саласындағы мемлекеттік саясаттың басым бағыттары, энергетикалық қауіпсіздікті қамтамасыз ету шаралары, инфрақұрылымды жаңғырту және жаңартылатын энергия көздерін дамыту туралы айтып өтті, деп хабарлайды ҚР Энергетика министрлігінің баспасөз қызметі.

Кездесу барысында өңірде жүзеге асырылып жатқан және жоспарланған жобаларға ерекше назар аударылды. Атап айтқанда, Қостанай облысында газдандыру жұмыстары жалғасуда – бүгінгі таңда өңірдің газдандыру деңгейі шамамен 60%-ды құрайды. 2025 жылы төрт жобаны іске асыруға 3,1 млрд теңге қарастырылған. Бұл шамамен 5,7 мың адамды қосымша табиғи газбен қамтуға мүмкіндік береді. Сонымен қатар, Қостанай, Рудный және Арқалық қалаларында жылу және электр желілерін қайта жаңғырту жұмыстары жүргізілуде.

Сонымен қатар, өңірде жаңартылатын энергия көздерін дамыту қолға алынған. Аукциондық сауда-саттық нәтижесі бойынша жалпы қуаты 250 МВт болатын төрт жоба жүзеге асырылады. Бұдан бөлек, қуаттылығы 1 ГВт болатын және энергияны жинақтау жүйесімен жабдықталған жел электр станциясын салу жобасы таңдалды. Жоба 2028 жылы іске қосылады деп жоспарланған.

Тұрғындар кездесу барысында белсенділік танытып, газ және жылумен қамту, желілерді жөндеу және өзге де маңызды мәселелер бойынша сұрақтар қойды. Вице-министр барлық сауалдарға нақты жауаптар мен түсіндірмелер берді.