QAZAQ GREEN. Швейцариялық Energy Vault стартапы Қытайдың мемлекеттік энергетикалық желілеріне сыйымдылығы 100 МВт-сағ болатын бірінші гравитациялық типті EVx энергия сақтау жүйесін қосты. Сондай-ақ, компания осы елде үш қосымша жоба салуға кірісті, деп хабарлайды компания сайты.

Компания 2023 жылдың желтоқсанында Rudong (Жудун) EVx жүйесінің Қытай мемлекеттік энергетикалық желісіне сәтті қосылғанын растады. Қуаты 25 МВт/100 МВт-сағ болатын бұл жүйе қазірдің өзінде жұмыс істеуге дайын және мемлекеттік желі шеңберінде жұмыс істей отырып, қуатты кері беруді жүзеге асыра алады. Ол Цзянсу провинциясының Жудун уезінде орналасқан.

Energy Vault технологиясының мәні – ауырлық күшін пайдалану, бірақ әдетте гидроэнергетикалық қоймаларда қолданылатындай емес. Суды сорғылармен көтерудің орнына, крандар ауыр блоктарды көтеріп, осы жұмысқа жинақталған электр энергиясын жұмсайды. Электр энергиясын алу қажет болғанда, қондырғы төмен түсіп, генератор моторын іске қосады. Потенциалдық энергия электр энергиясына түрленеді. Сынақтар көрсеткендей, мұндай жүйенің тиімділігі 75% құрайды.

Роберт Пикони, Energy Vault директорлар кеңесінің төрағасы және бас директоры, Қытайдың энергетикалық саясаты аясында компаниялардың технологияларды енгізуі өсіп келе жатқанын атап өтті

Energy Vault гравитациялық, аккумуляторлық және сутегі энергиясын сақтауды қоса алғанда, коммуналдық желілерде энергияны сақтау шешімдерін әзірлеуге маманданған. Компания энергияны өндіру мен бөлудің тиімділігін арттыруға, сондай-ақ экологиялық таза энергия көздеріне көшуді қолдауға бағытталған.