QAZAQ GREEN.  Парижден оңтүстік-батысқа қарай 40 шақырым жерде орналасқан A10 автомобиль жолының учаскесінде әлемдегі алғашқы нақты қозғалыс жағдайында электромобильдерді динамикалық индукциялық зарядтау жүйесінің жол сынақтары басталды. VINCI Autoroutes басқаратын консорциум Electreon, VINCI Construction, Густав Эйфель Университеті және Hutchinson компаниясымен бірлесіп Charge as you drive («Қозғалыс кезінде зарядта») жобасын жүзеге асырады, деп хабарлайды VINCI Autoroutes.

Әзірленген технология арнайы қабылдағыштармен жабдықталған электр жүк көліктеріне, автобустарға және жеңіл автомобильдерге жолда жүру кезінде заряд алуға мүмкіндік береді.

Әзірлеушілердің бағалауы бойынша, жүйені жаппай енгізу аккумуляторлардың мөлшері мен сыйымдылығын едәуір қысқартады, электр көлігін арзанырақ, жеңілірек және тиімдірек етеді, сондай-ақ батареялар өндірісімен байланысты шикізатқа деген қажеттілік пен көміртегі ізін азайтады.

Жабық полигондарда бірқатар зертханалық және далалық сынақтардан кейін индукциялық шарғылар ұзындығы 1,5 км автомобиль магистраліне орнатылды. Бұл учаскеде қазірдің өзінде әр түрлі көлік түрлерінің прототиптері – жүк көлігі, фургон, жеңіл автомобиль және автобус сынақтан өтуде.

Жоба әлемдік деңгейдегі электромобильділік пен зарядтау инфрақұрылымына көзқарасты өзгертуге қабілетті жаңа технологияның әлеуетін көрсетеді.