QAZAQ GREEN.  Бейжіңде өткен Қазақстан-Қытай іскерлік кеңесінің сегізінші отырысында Түркістан облысында қуаты 300 МВт болатын күн электр стансасын салу жобасына қатысты негізгі келісімдерге қол қойылды, деп хабарлайды Энергетика министрлігінің баспасөз қызметі.

Қазақстан Энергетика министрлігі мен China Energy Engineering Group арасындағы инвестициялық келісім мен электр энергиясын сатып алу шартына Мемлекет басшысы Қасым-Жомарт Тоқаевтың қатысуымен қол қойылды.

Жаңа күн электр станциясы Түркістан облысының Сауран ауданында салынады. Жобаның инвестиция көлемі шамамен 320 миллион АҚШ долларын құрайды. Құрылысты іске асыру 2025-2026 жылдарға жоспарланған.

Энергетика министрі Ерлан Ақкенжановтың айтуынша, бұл келісім – Қытаймен «жасыл» энергетикадағы стратегиялық әріптестікті тереңдетудің айқын дәлелі. Жоба еліміздің энергетикалық жүйесін нығайтып, жаңа жұмыс орындарын ашуға мүмкіндік береді және көміртегі бейтараптығына қол жеткізу жолындағы маңызды қадам болмақ.

Жаңа күн электр станциясының құрылысы еліміздің энергетикалық балансын әртараптандыруға және жаңартылатын энергия көздері үлесін арттыру жөніндегі стратегиялық мақсаттарға қол жеткізуге айтарлықтай үлес қосады. Сондай-ақ жобаны іске асыру Қазақстанда жаңартылатын энергетика саласындағы технологиялық мүмкіндіктердің одан әрі дамуына ықпал етіп, елдің «жасыл» экономикаға көшу бойынша өңірлік көшбасшы ретіндегі мәртебесін нығайтады.